Hüt Morge hei üs d Querflöte mitem klangfvolle «Morgenstimmung» gweckt. Nachem Zmorge heimer ider A- und B-Band i letscht Morge mit Gsamtprobe gstartet. Zum Zmittag hetts Fleischchäs mit Teigwahre are feine Sauce und natürlich mit Salat gä. Nachem Zmittag heimer nachder lange Pouse wo einigi fürne bruuchte Mittagsschlaf brucht hei i üsi letschti Gsamtprob vor der Houptprob gstartet. Womer de die letschte Steue im Programm güebt hei, heimer die Houptprob chönne mache. Zersch het d B-Band ihres Programm vorgspiut mit der A-Band und am Chuchiteam aus Zueschouer. U nachhär het no d A-Band dörfe zeige, was si güebt hei u d B-Band het dörfe zueluege u lose. Wo de die Houptprobe mit viu Applous und Gjubel beändet si gsi, het üs d Chuchi mit feine Aprikosechüechli überrscht, womer hei dörfe gniesse. Derzue heimer d Lagerumfraag ussgfüeut und d Blache für üses Zäut ungerschribe u hei fang chli afa ufrume. Wärenddäm es paar no am Lagerumfrag ussfüue si gsi, hei die angere z Schlagzügmaterial iglade u de oscho z Zäut ganz abbout. Das isch de o nid so lang gange, wüeu vili Häufer ihre Isatzt zeigt hei. Zum Znacht hets de no e grossi Uswau a Ässä gä, womer die Wuche scho einisch hei dörfe gniesse. Nachem Znacht simer i üse jährlich Spiliabe gstartet wo traditionsgmäs die eutischte Teilnähmer usem Lager organisiert hei. Mir hei vili Gruppespili gmacht wo die zämägwürflete Gruppe hei dörfe Wasser transportiere, Gägäständ errate, Fiumszene nachesteue usw. Dr Spiliabe abgschlosse heimer mit ere Schow wo d Gruppe hei döfre ihri istudierte Biträg uffüere u womer härzhaft hei chönne Lache.
Freitag, 11.07.2025
