Hüt am Morge si mir vo de Perkussioniste mit Gong und Snare gweckt worde. Ds hei sicher aui im Huus ghört. Nachemne feine z’Morge mit viu Frücht und o Schoggi het ner der Probetag ahgfange. Zersch hei mir i de Register probet und am spätere Morge hets no e Gsamtprob gä. I de Probe hets es paar müedi Gsichter gha und mir hei zersch aui chli müesse ufwache. Zur Stärkig hets zwüsche de Probe es chlises Znüni gä. Ds Wetter isch eher so mau gsi, uf üsem Probezelt het sich Wasser gsammlet und es isch e chli nass worde. Ds Zmittag hets Nudle mit Tomatesauce, Zucchettisauce oder Pesto gä. Am Namitag wäri eigentlich plant gsi, id Badi zgah. Ds het ds Wetter aber nid zueglah. Derum isch ds abgseit worde und mir hei stattdesse nomau e Registerprob und e Gsamtprob gha. D’Lagerleitig het o no e Liste ufghänkt, für potentielli Filme füre Filmabe. Dört si tz scho einigi Fiume druf und i bi de gspannt, was mir werde luege. Die jüngere hei e Spieli-Namitag gmacht und ner o nochli i de register güebt. I der Pause het ner ds erste Instrument e Schade erlitte – e chline Riss am Stimmzug. Üse Hornregisterleiter het ds ner fachgemäss mit Klebband gflickt. Zum z’Nnacht hets ner feini Ofehärdöpfu gä, frittierts Poulet und Maiskolbe. Isch wie immer superfein gsi! Als Alternative hets o no frittierte Tofu, Salat und Tomatesalat gha. Ner hets nomau e kurzi Prob gä, wo me scho einigi Fortschritte het chönne ghöre. Nach dem probeintensive Tag hei mir ner der Abe no la usklinge mit Spieli und Unterhaltige. Und ner isches o scho richtig Bett gange, damit am nöchste Tag aui wieder fit si.
Montag, 07.07.2025
