Hütt morge simer vo de Flöte und de Oboe mit ihrem ‚schönste’ Usschnitt us üsem Houptstück ‚Alba Ouverture‘ us em Land vo de Tröim ghout worde. Nachem wie immer mega feine Zmorge heimer üse letsch intensiv Probetag i Agriff gno u hei nomau i üsne beide Bands der Morge mit Gsamtprobe verbracht und letschti Fählerli und Unstimmigkeite besitigt. Fürs letschte Zmittag, womer no in Broc hei dörfe gniesse, hett ds Chuchiteam nomau aues gä - äs hett nämlich Lasagne gä 🙂
Während der hütt chli lengere Mittagspouse heimer de no üses Zäut, wo üs i de letschte Täg sehr zueverlässig vo Wind, Räge und Sunne gschützt hett, zämebrotzt. Daran hett sicher o der Hugo - ds härzige Vögeli, wo üs die ganzi Wuche Gseuschaft gleistet hett und immer wieder mau während de Probe übers Zäutdach ghüpft isch - Fröid gha, da er so jetz de wieder chli besser i sis Versteck cha.
Am Namitag heimer de nomau separat igspiut - dasmau aber dinne, da s zu dem Ziitpunkt zimli fest hett afah rägne. Und denn isch der erst gross Moment vom Musiglager cho, denn d A- und B-Band hei sich gägesitig ihres Konzertprogramm vorgspiut. Es hett zwar noni aues perfekt funktioniert, aber im Grosse u Ganze chöimer ganz zfride si.
Um Foodwaste vorzbeuge hetts zum Znacht de no Räste vor Wuche gä, bevor mir i traditionell Spiuabe gstartet si. In 8 Gruppe ufteilt hetts ir erste Rundi verschideni Pöste z absolviere gä. Da isch vome Quiz, über Noteständer zämelege bis zum blinde Schokokuss füettere aues derbi gsi. Aschliessend, nacheme mega feine Dessert, ischs de i di zwöiti Rundi gange. Hie hei aui Teams, ir Ranglistereihefoug vor erste Rundi, e Song chönne ussueche u hei derzue e Choreographie müesse erfinde. Da derbi si natürlich ou ganz lustegi Sache usecho, wie der i de Biuder chöit gseh. Nach der Rangverkündigund heimer de no üse letscht Abe gmüetlich la usklinge und fröie üs scho jetz uf ds Konzert vo morn.
Freitag, 12.7.2024
