Hüt simer mit em ne – lut de Interpret*inne – «haubbatzige Choral» vo de Saxofon ufgweckt worde. Wie immer het üs ds Zmorgebuffet sehr viu Uswahl botte, sodass mir satt und meh oder weniger früsch i üsi morgendenlechi Gsamtprob si gstartet. Vorem Mittag hei mir konzentriert a üsne Stück gschaffet, um üs ufe Konzärtdurchlouf am Namitag vorzbereite. Nach üsne Morgeprobe hei mir vom Chuchi-Team Älplermagrone mit Öpfumues und Salat dörfe gniesse.
Da mir am Namitag es spezieus Programm hei gha, het üsi Gsamtprob nachem Mittag e chli früecher agfange aus i de letschte Täg. Obwohl dä Wächsu zersch nid aui mitbrcho hei, hei mir schlussamänd e produktivi Prob gha und mit dr B-Band zäme es Stück mit bsundrigem Text chönne istudiere.
Nach dr Prob hei mir e freie Namitag gha. Di meiste si i di guet glägeni Badi oder hei Zyt im Lagerhuus verbracht, es paar hei nach dene proberiiche Täg wahrschinlech ou no chli müesse nacheschlafe. Für di feine Fajitas mit Salat drzue, wos hüt zum Znacht het gä, hei mir aui üs pünktlich wider zämegfunge.
I üsere Abeprob hei mir wider a üsne Stück gschaffet und unger angerem ou üse IIlouf güebt, agfüehrt vo de Perkussioniste. Trotz einige Flöige-Attacke hei mir dr hütig Probetag guet chönne abschliesse und wüsse jetzt, was mir individuell no müesse aluege. Nach dr Prob hei mir de dr Abe no chli la usklinge, sigs dür Sport, Zämesy oder dürs Schribe vom Tagesbricht.
Donnerstag, 10.07.2025
