Hüt cheibe früeh am Morge si mir ufgstande um is beschte Lager vom Seeland z reise, is MuLaSee. Mit zwöi Care si mir abgholt worde um is schöne Friiburger-Land z reise, gnauer gseit uf Broc is Lagerhuus Les Eterpaz. Normalwiis fahrt me da härä u när gits zerscht emau Zmittag. Aber nid so hüt. Zuefälligerwiis isch s Fest Broc’dway genau näbem Lagerhuus und es het zur Ziit vor Afahrt e Umzug gä. Donnerwätter isch das es Gnusch gsi. Dr eint Car hets de gar nid ersch probiert u isch ersch mau zur Schoggifabrik go Zmittag ässä. Dr ander Car het dänkt Probiere choschtet nüt u isch när im Stou gstande. Pünktlech zur erschte Prob si de aui da gsi und me het mau si Platz im Orcheschter gsuecht. Am Afang hei mir d Note übercho und hei üs bis am haubi Vieri dür ne Blattläseprob kämpft. Am beschte tönt het när d Rueh(auso abgse vom Chindergschrei) nach dr Prob wos feine Chueche het gä. Nach dere süesse Sterchig ischs bis zum Znacht mit Regischterprobe wiiter gange. Zum vrdiente Znachtässä hets när laktosefreii, vegani, glutefreii, us fairen Anbou kommendi Spinet-Ravioli gä. Di si cheibe fein gsi. Es paar armi Tröpf hei no muesse go abwäschä u när ischs scho mit dr letzte Prob vom Tag wiitergange. U mir säge öich es het de scho veiechli besser tönt aus am Namitag. Am Schluss het me dr Abe no schön chönne usklinge u isch när natürlech früh is Bett gange um am Morge parat ds si für di nöchschti Prob.
Tabea u Cyril, Klarinettenregister
Samstag, 05.07.2025
